E Busto di Boy Ecury

Segundo Jorge Adelberto Ecury (“Boy”) a nace dia 22 di april 1922, na Oranjestad, Aruba. Na 1937, el a muda pa Hulanda pa sigui cu su estudio. Durante Segundo Guera Mundial, Ecury no por a keda indiferente na e inhusticianan cu el a mira y a bay forma parti di e movemento di resistencia clandestino pa canalisa su frustracion den accion.

Dia 5 di november 1944, despues di a wordo traiciona, el a wordo aresta despues di misa. E siguiente dia mes, dia 6 di november, el a wordo ehecuta na Den Haag (Waalsdorpervlakte)cu apenas 22 aña di edad. Su sacrificio no a pasa sin wordo reconoce. Dia 28 di april 1947 su restonan mortal a wordo debolbe na Aruba, unda el a wordo dera di nobo cu honornan militar completo. Decadanan despues, na 1984, e Gobierno Hulandes a otorga e ‘CruzConmemorativo di Resistencia’ postumamente como reconocemento di su curashi.

Ecury ta wordo recorda no solamente pa su balentia pero tambe pa su integridad, captura den su palabranan notabel: “Den cas di mi tata no tin luga pa traidonan.”